Menu
Met die snelle ontwikkeling van Klerksdorp was dit nodig om ‘n skool in Wilkoppies van Laerskool President af te stig. Op 29 Junie 1949 word die dorpsgebied Wilkoppies geproklameer. Die naam is afgelei van die omgewing.
Op 12 Januarie 1954 is die skool met 238 leerlinge geopen. Die skool staan bekend as Wilkoppies Afrikaan Medium Laerskool.
In 1955 open die skool eers op 1 Februarie a.g.v. ‘n polio-gevaar. Mnr. J.P. Malan was die eerste waarnemende hoof wat die voorereidende werk moes verrig. Op 1 Januarie 1955 het mnr. P.W. Lötz die eerste permanente hoof geword en mnr. G. de Korte, die eerste permanente onderhoof. OP ‘n personeelvergadering in 1955 word besluit om die skool se naam te verander na Laerskool Saamtrek met die leuse “Werk en Glo”.
Aan die begin van 1962 is begin om die terrein in orde te kry vir die nuwe skoolgebou. Op 22 November 1963 word ‘n gedenksteen deur senator P.W. de Villiers gelê. Die gebou is amptelik deur mnr. A.J. Koen, Direkteur van Onderwys geopen. Klaskamers is met tyd aangebou en op ‘n stadium in die begin jare is klasse in tente ingerig.
In 1996 word Saamtrek die eerste skool in Klerksdorp wat ‘n Gr. R klas open met juf. Christa Kotze aan die stuur van sake.
Op versoek van Mnr. P.W. Lotz word die skoolwapen deur mnr. P.J. v.d. Merwe, ‘n kunsonderwyser verbonde aan Klerksdorp Hoërskool ontwerp. Die twee hande simboliseer die naam van die skool, Saamtrek. In 1959 skenk Diana le Roux (Gr. 5) se pa mnr. J.M.H. le Roux ‘n wapen uit hout gekerf aan die skool. Dit hang steeds in die skoolsaal.
Laerskool Saamtrek se skoollied word op 15 September 1972 die eerste keer gesing. Die lirieke is geskryf deur deur mnr. Johan v.d. Merwe wat destyds die Afrikaanse onderwyser was. Die toonsetting is gedoen deur me. Wilna Bogenhofer.
Ons skool is gefundeer op waardes en norme waar kinders leer om mekaar met respek, liefde en omgee te bejeën.
‘n Akademiese standaard van uitnemende gehalte, met sport en kultuur as deel van die opvoedkundige program.
Laerskool Saamtrek se volle kurrikulum is reeds digitaal opgeneem, verwerk en geplaas op die digitale platvorm.
Ons is met die Noordwes-universiteit in kontrak verbind vir die kwaliteit ontwikkeling van ons leerlinge se leesvaardighede.
Die nuutste toevoeging tot die leerplan is kodering waar leerlinge leer om self te programmeer.
Die wêreldgehalte verrykingsprogram word gratis aan al ons Gr. 1 tot 3 leerders verskaf.
Ons deurlopende toegewydheid verseker die beste vir elke ingeskrewe leerling. In samewerking met die NWU is ons fokus gerig op die ontwikkeling van ons leerlinge se leervermoë. Met instansies soos S.A. Maths as deel van ons span, ontwikkel ook hul wiskundige vermoëns. Ons loods sedert 2021 kodering as ‘n noodsaaklike vaardigheid by ons kinders. Professionele afrigting op sport- en kultuurvlak maak ook deel uit van ons kurrikulum.
Ons lewer ‘n stewige platform vir al ons leerlinge waarop ‘n sterk fondasie vir hul toekoms gebou word. Die venster van geleentheid is baie klein en wanneer die leerling laerskool verlaat is dit te laat om nog boustene in plek te probeer plaas as fondasie vir akademiese sukses.
Elke ingeskrewe leerling by Laerskool Saamtrek sal dus voordeel trek uit hierdie onwrikbare doelwit. Omdat elke leerling van die skool vir ons uiters belangrik is, fokus ons deurgaans op die optimale ontwikkeling van elke leerlinge se eie en unieke potensiaal, vaardighede en talente. Hier is dus plek vir ieder en elk by Laerskool Saamtrek.
Laerskool Saamtrek se toekomsvisie is reeds in plek met ‘n hoë tegnologiese aanslag in die onderrig en opvoeding van ons leerlinge in alle grade.
Alle klaskamers, kantore, en speelareas is voorsien met ‘n top gehalte internettoegang. ‘n Digitale metodiek van onderrig verseker ‘n genotvolle en leersame leerervaring in die klaskamer. Elektroniese lesmateriaal maak elke aanbieding ‘n nuwe leer-avontuur met kleur en klank.
Tydens die dag kan u aansoekvorms invul en inhandig of saamneem en terugstuur. Druk op die skakel hieronder om die aansoekvorms af te laai.
Stuur nasorg aansoekvorms direk na: topakademie100@gmail.com
