Wie is Ons

Ons deurlopende toegewydheid verseker die beste vir elke ingeskrewe leerling.

Ons Filosofie

Ons is ‘n voornemende skool in hoofstroomonderrig, meeste van ons ingeskrewe leerlinge behaal voortdurend tydens hulle verbintenis tot die Laerskool verskeie akademiese, sport en kulturele toekennings.

Ons leerlinge oortref verreweg die res in terme van hul aanpasbaarheid ten opsigte van nuwe uitdagings as gevolg van aangeleerde en verworwe hanteringsvaardighede wat weer aanleiding gee tot kwaliteit prestasies in hul akademiese werk.

By Laerskool Saamtrek streef ons daarna om ‘n atmosfeer te skep van ‘n huis weg van die huis vir al ons kinders, waar elke kind as individu gesien en geliefd is.

Geskiedenis

Die skool is gebou en in gebruik sedert 1954. Die skool was toe bekend as Wilkoppies Afrikaans Medium Skool. Die skool open vir die eerste keer met 238 leerlinge. Mnr P.W. Lötz was die eerste skoolhoof wat aangestel is.

Die hoeksteen vir Laerskool Saamtrek is op 22 November 1963 gelê, en die amptelike opening is gedoen deur mnr. P. W de Villiers wat destyds ‘n senator was.

Ons leuse is: “WERK EN GLO”. Ons dien ook ons slagspreuk aan elke deelgenoot van ons skool: “Waar elkeen gelukkig is”.

Vandag is Laerskool Saamtrek ‘n baken van uitnemendheid in die Klerksdorp gemeenskap. ‘n Skool wat ondersteun en gerespekteer word deur alle deelgenote.

Stellinge

Visie

Laerskool Saamtrek wil deur middel van ‘n gefundeerde waardesisteem, ‘n alomvattende en uitnemende akademiese, sport en kulturele grondslag bied vir elke leerling, sodat hulle deur middel van ‘n lewensrelevante onderwysprogram en buitemuurse aktiwiteite as gebalanseerde individue hul rolle in die gemeenskap kan vervul en gereed is vir voortgesette onderwys wat tot voordeel van die Suid-Afrikaanse gemeenskap sal strek.

Missie

Die grondslag van die waardesisteem tot ‘n alomvattende en dinamiese akademiese, sport en kulturele grondslag is:
Respek, nederigheid, integriteit, lojaliteit, eerlikheid, vergifnis, vriendelikheid, pligsgetrouheid, omgee, en dankbaarheid.

Waardes

Laerskool Saamtrek is ‘n laerskool wat onderrig-, opvoedings- en ontwikkelingsgeleenthede bied vir alle kinders van Gr. RR tot Gr. 7. Ons personeel is voortreflik gekwalifiseerd, innoverend, ervare en passievol oor hul verantwoordelikhede as onderwysers, afrigters, mentors en ondersteuningspersoneel.

Algemene Inligting

In samewerking met die NWU, Care to Kids en Lapa boekuitgewers is ons fokus gerig op die ontwikkeling van ons leerlinge se leervermoë. Me. Meliza Fourie is die huidige projekleier by Laerskool Saamtrek. Hierdie projek is ‘n kontraktuele verbintenis met die genoemde partye vir ‘n tydperk van 3 jaar wat in 2023 sal verstryk. Ons fokus is op die Grondslagfase waar ontluikende lees intensief ontwikkel en onderrig word. Die projek is verpligtend vir die leerlinge in die genoemde fase.
Met instansies soos S.A. Maths as deel van ons span, ontwikkel ook hul wiskundige en probleemoplossings vermoëns. ‘n Konkrete ervaring lei tot makliker insig en probleemoplossings. Me. Mariaan van der Merwe is die skakelpersoon by Laerskool Saamtrek.
Ons loods sedert 2021 kodering as ‘n noodsaaklike vaardigheid by ons kinders, wat direk gekoppel is aan die ontwikkeling van taalontwikkeling en wiskunde vaardighede. Leerlinge word in 3 vlakke onderrig, nl.: Beginners, intermediêre en gevorderde vlak. Ons aanbieders is van uitnemende gehalte met bewese reputasies in hierdie veld. Mnr. Leslie is die projekleier en aanbieder van die gevorderde vlak.

Professionele afrigting in alle sport- en kultuurkodes gee ons leerlinge ‘n astronomiese voorsprong bo alle kompeteerders. Hierdie afrigters is nie bloot onderwysers met ‘n kundigheid en passie vir die betrokke aktiwiteite nie, hulle is uiters professioneel, kundig en toegewyd tot selektiewe aktiwiteite waarvoor hul gekontrakteer is deur die skool se Beheerliggaam. Mnr. Hermann Venter is die koördineerder van alle aktiwiteite wat by die skool aangebied word.
Ons beskik oor ‘n voltydse kondisioneringsafrigter wat deurentyd gedurende klastye vir Lewensvaardigheid- en Lewensoriëntering gestruktureerde talent identifisering doen vir alle leerlinge. Die afrigter doen ook skakelwerk tussen die verskeie sport- en kultuurkodes om geïdentifiseerde leerlinge te ontplooi by aktiwiteite. Mnr. Jacques van Staden is die huidige afrigter.
Ons beskik ook oor ‘n voltydse Opvoedkundige sielkundige (Dr. Jan Snyman) asook verskeie arbeids-, spel- en spraakterapeute wat omsien na ons leerlinge se emosionele welstand. Hierdie spesialiste doen gereelde toetsings, evaluerings en terapie om te verseker dat leerlinge met geïdentifiseerde probleemareas nie agterwee gelaat word nie.
Ons voltydse bemarker, me. Petru Myburg wat omsien na die publisering van alle gebeurlikhede by die skool. Sy is ook primêr verantwoordelik vir die bemarking van ons skool. Sy neem ook ‘n leidende rol in die organisering en aanbieding van skoolprojekte.